媽媽想瞓一覺原來好難

瞓唔夠...精神就唔好...
不過...媽媽係會有無窮無盡既力氣去應付屋企...
夜欄人靜...媽媽就會唔想瞓...享受一下少少私人時光...
當上媽媽你就會發覺瞓覺係一件好奢侈既事...

我想講我由懷孕中期開始就已經瞓得唔好...
荷爾蒙令消化系統減慢...進食後會出現胃脹...一向胃唔好既我點可能入睡...
隨住子宮日漸擴大...膀胱受到擠壓容易尿頻...尿頻攪到一晚去幾次廁所...瞓着一陣醒...真係好難去到深層睡眠...
加上血液循環減慢...好多時半夜會腳抽筋抽醒...想瞓番唔係咁易...
跟隨胎兒日漸長大...影響身體其他部位而出現腰酸背痛...周身痛係好難瞓得到...
一日積一日...再到生前既陣痛痛到輾轉反側未能停下來...
繼而用盡所有氣力生BB...攰到一個點...
稍稍休息一陣就要接番BB自己湊...

住院既兩日...一對一...
一日要餵八至十二次奶...餵完奶掃風...
加上BB便便特別多...換完一陣轉頭又來過...
換片餵奶掃風無限LOOP...
點可能瞓得到...

出左院回家...正式踏入坐月期...一樣係無覺好瞓...
BB唔識埋身食奶...只有泵奶用樽餵...
為左追奶...要用原本可以休息時間泵奶...
泵完奶餵埋奶再掃風...
我想講已經差不多要泵奶準備餵下一餐奶...
唔好講瞓覺...休息時間已經可以話得來不易...

自己坐月要兼顧自己食既方面...
老實說...有時攰到係唔想食...
不過怕唔食會冇奶就硬食入口...求求食就一餐...而食係不知其味...
幸好...我家有兩個幫手...
待幫手放學放工回來就係我安心瞓陣既時刻...

有人可能會話請個坐月就舒服好多...
我知...不過...坐完月一樣係要面對...
既然...只是遲早問題...
不如...慳番一筆啦...
一個BB真係洗多好多...
為母則強...我相信我可以...一手一腳自己攪掂...

坐月期間...攰係好攰...不過...瞓覺途中係會不自覺咁醒...
心卦卦...擔心自己唔發現BB嘔奶...
瞓瞓下又會伸手去感受下BB有冇心跳有冇呼吸?
我相信唔止我一個係咁...
好多媽媽同我情況一樣...患有少少恐懼症...

一日又一日...咁就到一百日...
好感恩...星雨未有俾我太大難題...喊係有...但唔算多...
星雨已經係一個好少喊既BB...
記得星月頭一百日...一到夜晚就喊個不停...一定要抱住瞓...一放低就一定喊..
真係好難瞓到...

隨住BB一日一日咁大...不止食奶同瞓覺既階段...
唔再係食飽就瞓...瞓飽就食...
媽媽就要俾多D時間陪下BB成長...
學下枱起頭仔...學下反身...
星雨係精力旺盛...愛玩愛轉身...
一識得反身...一有機會就反身...不過...
又唔懂得自動反番轉...一定要睇到實一實...避免發生意外...

到左BB需要加固既階段...媽媽就要俾多D時間協助BB加固...
無論係傳統餵食定BLW...一樣係需要多點時間同耐性去協調...
BB可以正式加到一餐固...就要用心鑽研點令BB食得有營...食得津津有味...
遇上食得慢既BB...媽媽就有排攪...

一個月又一個月...就咁到一歲了...
BB瞓得會再少一點...其餘時間就係周圍爬學下企學下行...
媽媽就要看牛咁看到實...一眼不能離開...
到學識行又未行得定最頭痕...一唔小心就跌低...
媽媽要跟住行...
到行得定就一屋走...雙手就開始多多...樣樣掂下樣樣摸下...
最愛地下執毛毛...一執到就俾條毛媽媽...
媽媽係要金睛火眼吼到實一實...想合上眼休息一陣真係唔好諗...
有人會話BB瞓就跟住瞓...咁屋企野邊個做?
我屋企冇錢請工人...家頭細務係要我做...飯係要我煮...
一定係等BB瞓既時候開TURBO做...做得幾多得幾多...
一歲BB 瞓得唔會好多...只有一個午睡個零兩個鐘...
為左令BB有早睡睡起習慣...九點左右就要開始陪睡...
到BB瞓左就繼續做餘下既家務...
最後就有少少私人時間...私人時間有部分要預留俾BB個爸爸...
除左照顧BB...媽媽同時要顧下BB個爸爸同BB個姐姐...
一家人要傾下計...維繫一下感情...
唔可以有BB就唔理其他人...
最後最後的時間...食下少少零食...睇一陣電視咁
媽媽就去得瞓覺啦...

母乳bb有時奶睡...半夜會起身飲啖奶...
半夜一醒...媽媽唔係話瞓就得番...
瞓得番一陣可能已經要起身了...

媽媽唔可以瞓到自然醒...BB一醒就要跟住起身...
陪住小寶貝...
以為BB夜左瞓...第二朝會瞓晏少少...你就錯啦...
BB精力無窮無盡...真係唔好幻想得太多...

一個唔好彩...BB病就唔好諗住瞓到覺...
BB唔舒服會好扭計...由朝扭到晚...
行又唔係...企又唔係...抱又唔係...坐又唔係...
BB瞓下醒下...媽媽根本唔可以放心咁瞓...
怕BB病情有變...怕自己睇少一眼...

如果可以...媽媽係好想好好瞓一覺...




FACEBOOK 專頁 : https://www.facebook.com/mrmoon.renelee
INSTAGRAM ~ MRMOONMOON

聯絡我 ~ bbg1668@yahoo.com.hk