事隔十三年...我已經唔記得個陣點湊初生啦...
加上個陣放完產假之後有舅母幫我湊...唔係完全一手一腳自己攪...
遇上問題唔係我一個人去面對...
到小雨...真真正正一手一腳啦...
七月二十五日...小雨三個月大啦...
老實說...初初幾日真係唔係太習慣...
每次抱起小雨要特別的輕手...好彩小雨算大件...唔係就要再小心翼翼...
出院第二日...小雨就去左睇急症...
話說係小雨臍帶甩左一大半...餘下一條絲咁吊住...傳來一陣腥味...
見到咁...嚇到我同老公飛的去醫院...
好彩...只係我倆過份緊張...
肚臍仔無大礙...但要小心咁清潔同護理...
姑娘可能見怪不怪...無視吊下吊下既臍帶...快快手咁清潔左一轉...
虛驚一場...
單挑三個月...我覺得小雨算係好好湊...
記得大小姐個陣真係經常喊...夜晚真係長期要抱住...
抱到手軟...坐月真係完全無覺好瞓過...
小雨相比下好好多啦...只係偶然扭下計...
一睇小雨大大件就知唔需要擔心食既問題...夠鐘自自然然會大喊大叫...
喊到你俾奶佢為止...爭一啖都唔會放過你...
我只係要不停咁追奶...追奶追到我瘦...
頭兩個月可能仲係細啦...飲完奶會坐定定俾你掃風...
兩個月左右就開始有性格...間中就唔俾掃風...
遇上咁既時候就唯有抱耐少少啦...
話就話小雨好湊...不過...一樣有我唔想見到既問題出現...
陀住小雨...我好忍口...
牛肉...海鮮...真係唔敢掂...
只係去到中後期間唔中食下雪糕雪條...飲下凍飲咁...
清胎毒個期我一樣好勤力咁清...
好感恩...小雨皮膚算好了...
大小姐個陣既皮膚真係差得很...
R到周身損...一頭血...帶住手套仔一樣狂R...
個陣真係覺得好心痛...
相比之下...小雨真係小毛見大毛...
小雨喺五月頭開始面珠仔出左好多粒粒...
我好驚係濕疹...不過...仔細望望發現粒粒集中面頰下面同下巴位...
小雨啜奶啜得唔好...一路飲一路漏...驚覺可能會係奶癬...
我試過一飲完奶就用清水清潔...乜都唔搽...完全起唔到作用...
清潔太多抹走左面珠油脂...面珠有點乾...
我就試下清潔面珠之後塗上薄薄一層凡士林做潤膚...
點知有意外驚喜...一星期左右...奶癬絶跡...
竟然撞中醫番好...面珠靚番...心可以定下來...
安然過左一個月...小雨又來皮膚問題...
今次唔係面...係頸...
睇到已經感覺有點痛...
小雨有少少肥胖...頭仔又未可以伸直...
出汗又多...頸位摺住位置出現左汗疹...
短短兩日...情況已經變成咁...
伸埋去聞有少少異味添...
我見好多人推介寶貝濕疹膏...不過...小雨用唔係太WORK...
或者可能需要時間...而我比較心急...
頸位位置根本不能再等...
我怕到時要去睇醫生搽類固醇藥膏...
藥房老闆介紹我買左一支佐藤製藥出品既小兒皮膚膏...
上網揾過冇人介紹過...不過...佐藤製藥FACEBOOK就話呢支皮膚膏不含類固醇...
咁即管試一試...
一用就已經退了不少...紅腫範圍收窄左...
搽左三日...頸位之前紅腫位置好似乾哂水咁...
我就停用...等頸位慢慢自然好...
等待期間必須要保持乾爽...
頸位發紅情況久唔久會出現...不過...我會盡量避免腫起來...
發紅情況輕微...我會清潔多少少...跟住印乾...保持乾爽...
發紅情況持續同位置擴大...我就會臨瞓前搽一次藥膏...一搽第二日就會好番好多...
一波岩岩平定...一波又起...
小雨突然變左咸蛋超人...眼周又紅又腫...
當時我真係大受打擊...
望住小雨就想起大小姐...大小姐受濕疹困擾...
眼周經常會又紅又腫...
我個心不禁寒起來...好怕小雨一樣會受濕疹困擾...
我同小雨洗個面...跟手搽凡士林...
隔左一陣...情況有所改善...
可惜...過左一陣...又再開始紅腫...
除了...時好時紅腫...
第二日開始擴散...伸延開去...
當時仲未知道係咩一回事...只有四周圍問下...
試過金銀花水沖涼...片糖水沖涼...情況依然...
老公觀察之下終於揾到原因...原來係敏感引致...
敏感源頭來自 HIGH CHAIR 既坐墊...
小雨坐落去一陣就不停咁捽捽捽...好快就又紅又腫...
一直坐開點解會咁呢???細想之後發現敏感正正係洗完坐墊個日開始...
明明清洗程序一樣...點解會突然敏感呢???
即時拆左坐墊再洗一次同掉轉第二面使用...敏感消失左...
面珠經過一星期左右護理...終於雨過天晴...
講完會見人既地方...就講下唔需要見人既部位...小雨個屁股仔...
小雨差唔多餐餐一飲完奶就會放屁屁...一放屁屁就有好水狀既便便...
有時見隔左一陣未有屁屁就換片...點知一換又有屁屁...試過一餐奶換四轉...
唔知係我太大力定抹得太多...個屁股仔就會發紅...
我會用寶貝濕疹膏搽一搽...有時會退到紅...
不過...遇上接着幾日抹得太多...就會紅得勁...有時會腫起上來...
寶貝濕疹膏就未見起到消紅腫作用...
遇上紅腫...我又會瞓前換片個一轉薄薄搽一搽佐藤製藥既小兒皮膚膏...
第二日就消紅消腫...
唔好以為我收左錢幫小兒皮膚膏賣廣告...
只係我明白做爸爸媽媽見到自己個BB皮膚出現問題...真係會好肉痛...
情願有皮膚問題既係自己唔係個BB...
我只係想分享一下處理小雨皮膚問題既小小經驗...
當然...小雨岩用...唔代表所有BB岩用...
BB用任何野之前...爸爸媽媽最好自己搽一搽...睇下有冇特別情況...
如果要深入少少...可以問下醫生意見睇下岩唔岩個小朋友用...
FACEBOOK 專頁 : https://www.facebook.com/mrmoon.renelee
聯絡我 ~ bbg1668@yahoo.com.hk
純粹個人意見...請大家多多指教呢...
